I hob an grant

Von Christine Steindorfer

des gimpfte geht mir auf*,
wenn i die gfrießa siech*
mit eanare*
besn blick,
die an lecha ins herz fressn,
mit eanare
rot untalaufan augn,
die „auße mit euch“ schrein
und dann sogn se,
dass nua laut denkt ham
und ma wird doch
bittschen
no denkn deafn.

des feitl* geht mir in da hosn auf*,
wenn’s „unsare werte“ schrein,
wö des hot si da unsare-werte-himmelvota
so sicha net
denkt.
wenn sa sich über a frau
mit an kopftiachl
auslossn*,
als kunntat’s do drunta nix hean*.
i mechat dann
mein kopf an
ihrn kopftiachl-kopf
lahna*,
so wie is ois kind bei
meiner kopftiachl-großmutta
gmocht hob.

den gaugau von der eastkommunion stessts mir
auf*
und man kanns eam net vadenkn*,
dass er
saua wird
bei so vü schwefeliger luft,
die’s aus die
braunan münda
außablost.

auschrein mechat i’s,
wös* net übern töllarand schaun,
wös nua in der eiganen
daheagschwummanen suppm
umriahn
und uns damit des lebm
vasoizn*.

dabei wissadn wir‘s doch
bessa,
die wir unsare suppm mit die gschichtn
aus unsara fütablosn obschmeckn
und sie gonz longsam umriahn,
damit uns kana
von die
diversifiziatn
am bodn
aupickt.

mei friedfertigkeit mechat i in a
schochtl
legn und im
kölla
varamma*,
wö i mir nimmer zum höffn was
mit meiner
hüflosigkeit.


*mir geht des gimpfte auf: mir platzt der Kragen
*gfrießa siech: Gesichter [abwertend] sehe
*eanare: ihre

*feitl: Klappmesser
*des feitl geht in der hosn auf: jemand wird zornig
*auslossn: über jemanden herziehen
*als kunntat’s do drunta nix hean: als könnte sie darunter nichts hören
*an ihrn kopftiachl-kopf lana: an ihren Kopftuch-Kopf lehnen
*den gaugau von der eastkommunion stessts mir auf: es stoßt mir den Kakao von der Erstkommunion auf
*vadenkn: übelnehmen
*wös: weil sie
*vasoizn: versalzen
*varamma: verräumen wegräumen

Christine Steindorfer

*1973, ist Schreibtrainerin, PR-Beraterin und Autorin zweier Sachbücher zum beruflichen Scheitern. Sie lebt und arbeitet in Wien. Mit ihrem literarischen Schaffen trat sie 2019 an die Öffentlichkeit. Ihre Kurzprosa, Lyrik und Dialektgedichte wurden in Anthologien und Literaturzeitschriften veröffentlicht.

Webseite